لك خالص تحياتي

لك خالص تحياتي
واكبر كدبة كدبتها في حياتي
لما قلت ان انا حبيتك
كنت فاكرك تستاهل
واتريني كنت جاهل
وياريتني من الاول صديتك
ورفضت حبك رفضت قربك رفضت وجودك في حياتي
ولاكانت هتفرق معايا ولا كنت هتتسبب في اهاتي
بس كانت هتفرق معاك
لو رفضت انا هواك
وسبتك تتكلم ومسمعتكش
كنت هتعرف ساعتها اني مبحبكش
وهتحاول بكل ما فيك
تحببني فيك
كان ممكن تتذلل علشان تصعب عليا
علشان افكر فيك وامدلك اديا
كنت هتعمل كل اللي يرضيني
علشان بقربك تغريني
علشان بس احسسك بقربي
علشان تحس بمعنى حبي
بس انا من الاول مرضتش ان تكون كدا
اول ما نديتني رديت ليك الندا
وقبل ما تتكلم وتنطق بأي الكلام
حسستك بكل معاني الغرام
كنت فاكرك تستاهل
واتريني كنت جاهل
مكنتش عارف انك مغرور
بتحب تملي تعيش الدور
كل همك في الدنيا ديه
انك تبقى سبب في الازية
بتفرح لما بتعرف ان في ناس بسببك بتتالم
بتفرح لما بتعرف ان في ناس في بعادك بتموت ومش قادرة تتكلم
لما بتحس انك سبب في جرح ناس بزيادة ..بتبقى هتموت من السعادة
لما بتشوف دموع الناس على بعدك ..بتحس انك مفيش في الدنيا بعدك
بس للاسف انت مش عارف حقيقتك ايه
انت اقل من انك تكسر قلبي وتأسى عليه
انت حد بالنسبالي عادي
عمرك ما هتقدر تلغي شهادة ميلادي
عمرك ما هتكون سبب في اهاتي
ولا ببعادك هتسبب في مماتي
عمرك ما تكون ليا طريق للحب
انت يدوب للعب
اخرك معايا اني ممكن اصدئك
انما استحالة اعشئك
مش سهل ابدا اسلم قلبي لمجرد كلام اتقال
مش سهل اسلم لكلام ممكن يطلع وهم وخيال
لاكن سهل اتكلم وسهل انك تصدقني
سهل اوي اخليك من كلمة تقول انك بتعشقني
سهل بكلامي اوصلك لسابع سما وارجع انزلك تاني لسابع ارض
وسهل بردوا اخليك تموت كل يوم من البعد
قلمي كتير بيجامل مجتش يعني عليك
فرحتك بكلمتين وكسبت ثواب فيك
هوا دا طبعي متعودتش ع الاسية
وبردوا متعودتش حد يلعب بيا
كل اللكلام اللي كتبته عليك
كتبته لكتيييييييييييير قبليك
ولسة بعدك ناس مستنياه
هي دي طريقة المعاملة وهوا دا سر الحياة
بكلمة اجيبك وبكلمة اوديك
وبكلمة افرحك وبكلمة اقسى عليك
وبكلمة تانية اجرحك وبكلمة تانية افرحك
وكله كلام في كلام
متعرفش الحقيقة من الاوهام
ومتصدقنيش لما قلتلك انا جاهل
انا اصلي شاعر
وشعري نصه نفاق
ممكن اكتبلك بحبك وابقى ناويلك ع الفراق
ممكن اظهرلك ضعفي علشان بس تتكلم
علشان تامنلي وتيجي في حضني وتسلم
انما علشان اضعف بجد دا مستحيل
استحالة حد يملكني واعيش اسير
خلاص كدا خلصت حكايتك ووقتك معايا انتهى
كانت لعبة مش جميلة وفات وقتها
ورغم كل اللي قلتهولك
وكل اللي لسة شايهولك
ممكن بكلامي تاني ارجعك
وارجع من تاني اخدعك
وادوئك جرحي واهاتي
لك خالص تحياتي
بقلمي محمد صلاح