مش هقولك حبتيني وحبينك
ولا نسيتيني ولا نسيتيك
ولا عشقتيني ولا هويتك
وهأجل حبي وحبك ليوم تاني
بس انهرضا هقولك نفسي اشوفك يا مصر من تاني
نفسي اشوفك ناسية خوفك
وواخدة اولادك في حضنك فرحانة بيهم وناسية حزنك
ونفسي اشوفك زي امي
قلبك عليا وشايلة همي
تفرحيلي لما اكون فرحان
وتدفيني لما اكون بردان
وتعاقبيني لما اكون غلطان
بس لما ما اغلطش متعاقبش
واما اطلب حقي تديني
مش تذليني وتهينيني
ونفسي اشوف العدل فيكي ليه مكان
مش الكبير لما يغلط يتكرم والصغير حتى لو مغلطش يداس علية ويتهان
ونفسي لما تعلميني تشغليني
مش بعد ما يطلع عيني في سنين العلام ترميني
زمان من صغر سني واحنا في سنين الدراسة
كان فينا اللي بيحلم يبقى ضابط او مهندس
واللي يحلم يبقى دكتور او مدرس
واللي تحلم تبقى استاذة
عدت سنين العمر والوقت فات
فينا اللي بعد سنين علام لسة عاطل وفينا اللي مات
وفينا اللي ضحى بعمرة علشان نحقق حلمنا وعملناله ايه
راح واندفن في التراب حتى حقه سكتنا علية
عرفتي يا مصر نفسي اشوفك ايه
نفسي اشوفك ولو لمرة
تبقى جدعة وتبقي حرة
ومتسبيش حق اللي قالك متخافيش
ومتسبيش حق اللي مات علشان ملايين تعيش
عرفتي يا مصر نفسي اشوفك ايه
نفسي اشوفك زي امي وتحققيلي كل اللي بحلم بيه
ومتزعليش علشان في كلامي ممدحتكيش
بس كان عندي كلام ونفسي اقولهولك
واوعدك لو حققتيلي احلامي هفضل كل يوم اكتب واقول اني بمووووت فيكي
////////////////////////////
بقلم / ( محمد صلاح )
الخميس أغسطس 04, 2011 2:15 pm
