تصدق بمين
اول ما شفت ابتسامتك فوق ملامحك
عرفت انك من جواك عايش حزين
تصدق بمين
كل اللي شافو اسمك وصورتك
كل اللي شافو كلامك وسيرتك
قالو انك عايش حياتك كلها حب وسعادة
وكل ايامك هنا والفرح فيها زيادة
وميعرفوش ان ابتسامتك وراها قصة وحكاية
بدايتها الم ودموع والحزن فيها نهاية
وانك يا عيني بس بتهرب من الدموع
وبترسم فوق ملامحك ضحكة بصوت مسموع
بتداوي بيها دمعتك
بتداري قيها كسرتك
بتخبي فيها قصتك واللي شفته من السنين
تصدق بمين
من قبل ما اعرف ايه حكاياتك وايه اللي بيك
عرفت انك جواك جرح كبير مأثر فيك
وعرفت ان قصتك مليانه حزن عايش جواها طول السنين
تصدق بمين
لا الصورة بتداري اللي راح
ولا بسمة بتخبي الجراح
ولا اسم بيداري حكايات
ولا كلمة بتنسي اللي فات
وان كان كل اللي شافو اسمك وصورتك
كل اللي شافو كلامك وسيرتك
قالو انك عايش حياتك كلها حب وسعادة
وكل ايامك هنا والفرح فيها زيادة
دا حقهم
لان احساسهم مش زي احساس ودا شيئ يخصهم
/////////////////////////////////
بقلم / ( محمد صلاح )
الخميس أغسطس 04, 2011 2:25 pm
